誰人來扞家 圖：楊佳穎 文：施婉茹
中秋節連續假期欲到矣！
「阮阿爸昨昏就去菜市仔，買足濟好食的物件，而且共愛豉的、愛攕的攏發落好矣，等我放學轉去，就會使開始起火來烘肉矣。」阿明那講喙瀾那流 。
「你阿爸足賢的呢！佇阮兜，攏嘛是阮阿母咧攢的，」迎娣那講那幌頭 ，「阮阿爸逐工食便領清，一點仔嘛未體貼阮阿母。」
「查某人做家事本來就是天公地道的代誌，你沒看著『婦』這字，不就是查某人紮一支掃帚？」天才共迎娣應倒轉去。
「是呀！是呀！」阿聰嘛加入討論，「阮阿爸攏嘛講：『查甫人無咧攑菜刀。』灶跤是媽媽的天下。」
「啥物『天下』啊？用這兩个字就共查某人『關』在灶跤內囉。」小蓉感覺誠無奈。
「阿明矣！恁阿爸做遮的代誌，恁阿母按怎講？」天才越頭共阿明看一下，心肝內想講恁老爸哪會遮爾卸咱「查甫人」的面子。
「有啥物好講的？佇阮兜攏嘛按呢，阿爸講阿母下班轉來已經足忝的，若是阮家己會使做乎好的代誌，就莫麻煩阿母矣！」
「就是講嘛！阮阿爸嘛是按呢共我佮阮小妹講，」小蓉那講那笑，「無啥物人應該蹛佇灶跤內的，只要咱是這个家的一份子，每一个人攏應該為咱的家盡一份心力，親像阮兜的塗跤，攏是阮阿爸負責咧摒掃的呢！」
「恁咧討論啥物啊？」李老師那行那問，「上課鐘攏霆囉，恁那猶未坐乎好？」
「老師，阮咧討論烘肉的代誌啦！」阿聰連鞭轉去坐乎好，紲落來閣問，「老師，恁兜中秋節敢有欲烘肉？」
「當然嘛有！」李老師頕頭閣講，「阮翁早就共烘肉欲用的物件攏攢好囉！」 「啥物？老師，恁兜嘛是師丈咧攢遮的物件喔？」天才實在毋敢相信。
「有啥物不對？老師透早就來學校參恁作伴，那會有時間閣去買物件？師丈是我的翁，他攢共我攢，不是攏仝款？」
「毋過，俗語佇咧講：『男主外，女主內。』做人著愛惜本份，查甫查某做的工課那會仝款？」天才猶是感覺無妥當。 「法律敢有規定啥人應該負責攢烘肉的物件？」小蓉看天才猶閣咧堅持查某人要做家事，袂堪得共應一句。
「好囉，袂使冤家，這馬是民主社會，每一个人攏會使發表家己的看法，」李老師趕緊共怹挲一下，「每一項代誌嘛攏會使提出來討論。各位同學，恁兜的媽媽平常時有咧食頭路的人請攑手。」 全班將近四分之三的同學攏攑手矣，天才嘛是。
李老師笑笑矣講，「因為時代無仝，查某人共查甫人的權利沓沓仔那來那相像 ，親像是讀冊共食頭路，所以，有足濟觀念攏愛改變，古早人講的話，敢倘當做是『聖旨』？」
李老師佇烏枋懸頂寫「性別歧視」和「性別齊視」八个字，「查甫囡仔定定予人要求愛勇敢，袂使哭，按呢敢袂誠艱苦？查某囡仔嘛予人要求愛有『查某囡仔』款，不而過，歡喜的時陣笑出聲，又閣有啥物所在毋著咧？」
「就是講嘛！」聰明連鞭贊聲，「逐擺我若看著虼蠽，攏嘛足想欲吱矣，毋過著愛吞忍，誠實足艱苦矣！」 全班同學聽著聰明講的話，攏笑甲強欲落下頦 。
「惜本份的意思是講，逐个人攏愛佇家己的工作上照起工，並不是咧諍講查甫人愛做啥物工課，查某人又閣愛做啥物代誌？」
聽著李老師講的話，天才那想那頕頭，「想起來媽媽誠實足辛苦矣，我轉去愛苦勸阮阿爸，做一个疼某的『大丈夫』！」
「喔！天才，你真正有夠讚呢！後擺一定有足濟查某囡仔排隊欲嫁予你喔！」查某同學攏共天才拍噗仔，天才的面紅甲若烘熟的蝦仔仝款。
「好矣！咱愛準備上課囉！」聽著李老師這句話，全班同學攏唉甲大細聲。 「喂！袂記得愛『惜本份』呢？老師先祝福恁中秋節快樂，猶毋過……數學嘛是愛上喔。」
討論時間 1.繪本故事中，有哪幾位同學令你印 象深刻？他們的個性是怎樣的呢？
討論時間 2.故事中，同學們對於家事的分配有 哪些看法？
討論時間 3.你們家中的家事工作如何分配？你 對這樣的分配有什麼想法？
討論時間 4.你對「男主外，女主內」這句話， 有什麼看法？
討論時間 5.對不同性別的，大眾總是給予特定 的期望，你發現日常生活中，有哪 些「性別刻板印象」的例子嗎？
結語 因為咱攏愛咱的家，希望厝內每一个人蹛著更加好勢，所以愛做家事；閣再講，咱蹛佇遮，是家庭中的一份子，本來就應該愛鬥相共做厝内的工課才是。