Kū-iok Hô-se-a-su Tē it chiuⁿ Pa-khek-lé Siu-tèng-pán Sèng-keng 巴克禮修訂版聖經 Kū-iok Hô-se-a-su Tē it chiuⁿ 舊約 《何西阿書》 第一章 Hosea

Hô-se-a-su 《何西阿書》 Hosea Tē it chiuⁿ 第一章 Tē 1 chat 第一節 Tng O͘-se-ngá, Iok-thán, A-hap-su, Hi-se-ka saⁿ-soà choè Iû-tāi ông, Iok-a-si ê kiáⁿ Iâ-lô-pho-àm choè Í-sek-lia̍t ông ê sî, Iâ-hô-hoa ê oē lîm-kàu Pī-lī ê kiáⁿ Hô-se-a-su. 當O͘-se-ngá、Iok-thán、A-hap-su、 Hi-se-ka相續做猶大王，Iok-a-si ê kiáⁿ Iâ-lô-pho-àm做以色列王ê時， 耶和華ê話臨到Pī-lī ê kiáⁿ何西阿。

Hô-se-a-su 《何西阿書》 Hosea Tē it chiuⁿ 第一章 Tē 2 chat 第二節 Iâ-hô-hoa khí-thâu tùi Hô-se-a-su kóng ê oē sī án-ni. Iâ-hô-hoa tùi Hô-se-a-su kóng, Lí tio̍h khì chhoā îm-hū choè bó͘, iā tit-tio̍h tùi îm-loān só͘ siⁿ ê kiáⁿ; in-ūi chit-ê toē-hng toā kiâⁿ îm-loān, lī-khui Iâ-hô-hoa. 耶和華起頭對何西阿講ê話是án-ni。 耶和華對何西阿講， 你tio̍h去娶淫婦做bó͘， 也得tio̍h tùi淫亂所生ê kiáⁿ； 因為chit-ê地方大行淫亂，離開耶和華。

Hô-se-a-su 《何西阿書》 Hosea Tē it chiuⁿ 第一章 Tē 3 chat 第三節 Tùi án-ni, i chiū khì chhoā Tek-la̍h-im ê cha-bó͘-kiáⁿ Ko-bia̍t; hū-jîn-lâng hoâi-īn, kā i siⁿ chi̍t ê kiáⁿ. Tùi án-ni，伊就去 娶Tek-la̍h-im ê cha-bó͘-kiáⁿ Ko-bia̍t； 婦人人懷孕，kā伊生一個kiáⁿ。

Hô-se-a-su 《何西阿書》 Hosea Tē it chiuⁿ 第一章 Tē 4 chat 第四節 Iâ-hô-hoa tùi i kóng, Kā i miâ kiò Iâ-su-lia̍t; in-ūi koh tiap-á-kú, Goá beh pān Iâ-hō͘ ê ke tī Iâ-su-lia̍t thâi-lâng lâu-huih ê choē, iā beh hō͘ Í-sek-lia̍t-ke ê kok bô--khì. 耶和華對伊講，kā伊名叫Iâ-su-lia̍t； 因為koh tiap-á久，我beh辦Iâ-hō͘ ê家 tī Iâ-su-lia̍t thâi人流血ê罪， 也beh hō͘以色列家ê國無去。

Hô-se-a-su 《何西阿書》 Hosea Tē it chiuⁿ 第一章 Tē 5 chat 第五節 Kàu hit-ji̍t Goá beh tī Iâ-su-lia̍t pîⁿ-iûⁿ, at-chi̍h Í-sek-lia̍t ê keng. 到hit日， 我beh tī Iâ-su-lia̍t平洋， at折以色列ê弓。

Hô-se-a-su 《何西阿書》 Hosea Tē it chiuⁿ 第一章 Tē 6 chat 第六節 Hū-jîn-lâng koh hoâi-īn, siⁿ chi̍t-ê cha-bó͘-kiáⁿ; Iâ-hô-hoa tùi Hô-se-a-su kóng, Kā i hō-miâ Lô-lō͘-hap-má, in-ūi Goá bô beh koh lîn-bín Í-sek-lia̍t-ke, koat-toàn bô sià-bián in. 婦人人koh懷孕，生一個cha-bó͘-kiáⁿ； 耶和華對何西阿講，kā伊號名 Lô-lō͘-hap-má，因為我無beh koh 憐憫以色列家，決斷無赦免in。

Hô-se-a-su 《何西阿書》 Hosea Tē it chiuⁿ 第一章 Tē 7 chat 第七節 Chóng-sī Goá beh lîn-bín Iû-tāi-ke, ēng Iâ-hô-hoa in ê Siōng-tè kiù in, m̄-sī ēng keng, ēng to, ēng kau-chiàn, ēng bé, kap ēng bé-peng lâi kiù in. 總是我beh憐憫猶大家， 用耶和華in ê上帝救in， m̄是用弓，用刀，用交戰， 用馬，kap用馬兵來救in。

Hô-se-a-su 《何西阿書》 Hosea Tē it chiuⁿ 第一章 Tē 8 chat 第八節 Lô-lō͘-hap-má tn̄g-lin liáu-āu, hū-jîn-lâng koh hoâi-īn, siⁿ chi̍t ê kiáⁿ. Lô-lō͘-hap-má斷奶了後， 婦人人koh懷孕， 生一個kiáⁿ。

Hô-se-a-su 《何西阿書》 Hosea Tē it chiuⁿ 第一章 Tē 9 chat 第九節 Iâ-hô-hoa kóng, Tio̍h kā i hō-miâ kiò Lô-a-bí; in-ūi lín m̄-sī Goá ê peh-sìⁿ, Goá iā m̄-choè lín ê Siōng-tè. 耶和華講， Tio̍h kā伊號名叫Lô-a-bí； 因為lín m̄是我ê百姓， 我也m̄做lín ê上帝。

Hô-se-a-su 《何西阿書》 Hosea Tē it chiuⁿ 第一章 Tē 10 chat 第十節 Chóng-sī Í-sek-lia̍t ê lâng-gia̍h beh chhin-chhiūⁿ hái-soa, boē niû--tit, boē sǹg--tit; chêng tī sím-mi̍h só͘-chāi tùi in kóng, Lín m̄-sī Goá ê peh-sìⁿ, chiong-lâi tī-hia beh tùi in kóng, Lín sī éng-oa̍h Siōng-tè ê kiáⁿ. 總是以色列ê人額beh 親像海沙，boē 量得，boē算得； 前tī甚麼所在對in講， Lín m̄是我ê百姓，將來tī-hia beh 對in講，Lín是永活上帝ê kiáⁿ。

Hô-se-a-su 《何西阿書》 Hosea Tē it chiuⁿ 第一章 Tē 11 chat 第十一節 Iû-tāi lâng kap Í-sek-lia̍t lâng beh saⁿ-kap chū-chi̍p, ūi ka-kī siat-li̍p chi̍t ê thâu-lâng, tùi chit ê toē chiūⁿ--khì; in-ūi Iâ-su-lia̍t ê ji̍t beh choè toā ê ji̍t. 猶大人kap以色列人beh相kap 聚集，為家己設立一個頭人， tùi chit-ê地上去； 因為Iâ-su-lia̍t ê日beh做大ê日。