Kū-iok Iok-ná-su Tē 4 chiuⁿ Pa-khek-lé Siu-tèng-pán Sèng-keng 巴克禮修訂版聖經 Kū-iok Iok-ná-su Tē 4 chiuⁿ 舊約 《約拿書》 第四章 Jonah

Iok-ná-su 《約拿書》 Jonah Tē sì chiuⁿ 第四章 Tē 1 chat 第一節 Chóng-sī chit ê sū Iok-ná chin bô hoaⁿ-hí, toā-toā siū-khì; 總是chit-ê事 約拿真無歡喜， 大大受氣；

Iok-ná-su 《約拿書》 Jonah Tē sì chiuⁿ 第四章 Tē 2 chat 第二節 chiū kî-tó Iâ-hô-hoa kóng, Iâ-hô-hoa ah, taⁿ kiû Lí, goá tī pún-kok ê sî, kiám-m̄-sī án-ni kóng? Só͘-í goá koáⁿ-kín cháu-khì Tha-si, in-ūi goá chai Lí sī ū un-tián ê Siōng-tè, chhiong-moá lîn-bín, bô khoài siū-khì, ū hong-sēng ê chû-ài, koh thè-hoé só͘ kóng beh kàng-lo̍h ê chai-ē. 就祈禱耶和華講，耶和華ah，taⁿ求你， 我tī本國ê時，kiám m̄是án-ni講？ 所以我趕緊走去Tha-si，因為我知 你是有恩典ê上帝，充滿憐憫， 無快受氣，有豐盛ê慈愛， koh退悔所講beh降落ê災厄。

Iok-ná-su 《約拿書》 Jonah Tē sì chiuⁿ 第四章 Tē 3 chat 第三節 Iâ-hô-hoa ah, taⁿ kiû Lí chhú goá ê sìⁿ-miā; in-ūi goá sí pí oa̍h khah-hó. 耶和華ah， taⁿ求祢取我ê性命； 因為我死比活khah好。

Iok-ná-su 《約拿書》 Jonah Tē sì chiuⁿ 第四章 Tē 4 chat 第四節 Iâ-hô-hoa kóng, Lí án-ni siū-khì ha̍p-lí mah? 耶和華講， 你án-ni受氣 合理mah？

Iok-ná-su 《約拿書》 Jonah Tē sì chiuⁿ 第四章 Tē 5 chat 第五節 Tùi án-ni, Iok-ná chhut-siâⁿ, chē tī siâⁿ ê tang--sì, tī-hia ūi ka-kī tah liâu-á, chē tī ìm-ńg-ē, ài-beh khoàⁿ hit ê siâⁿ tàu-tí cháiⁿ-iūⁿ. Tùi án-ni，約拿出城， 坐tī城ê東勢， tī-hia為家己搭寮á，坐tī蔭影下， ài-beh看hit-ê城到底怎樣。

Iok-ná-su 《約拿書》 Jonah Tē sì chiuⁿ 第四章 Tē 6 chat 第六節 Iâ-hô-hoa Siōng-tè pī-pān chi̍t-châng pi-moâ, hō͘ i hoat-siⁿ khah-koâiⁿ Iok-ná, choè ìm-ńg jia i ê thâu-khak, hō͘ i bián kan-khó͘; Iok-ná in-ūi chit châng pi-moâ, toā-toā hoaⁿ-hí. 耶和華上帝備辦一叢箄麻， hō͘伊發生khah高約拿， 做蔭影遮伊ê頭殼，hō͘伊免艱苦； 約拿因為chit叢箄麻，大大歡喜。

Iok-ná-su 《約拿書》 Jonah Tē sì chiuⁿ 第四章 Tē 7 chat 第七節 Chóng-sī keh-ji̍t, thiⁿ-phú-kng, Siōng-tè pī-pān chi̍t bé thâng, chia̍h chit châng pi-moâ, tì-kàu ko͘-tâ. 總是隔日，天phú光， 上帝備辦一尾蟲， 食chit叢箄麻，致到枯焦。

Iok-ná-su 《約拿書》 Jonah Tē sì chiuⁿ 第四章 Tē 8 chat 第八節 Ji̍t chhut ê sî, Siōng-tè pī-pān iām-jia̍t ê tang-hong, koh ji̍t pha̍k Iok-ná ê thâu-khak, hō͘ i hūn--khì; i chiū ūi ka-kī kiû sí, kóng, Goá sí pí oa̍h khah-hó. 日出ê時， 上帝備辦炎熱ê東風， koh日曝約拿ê頭殼， hō͘伊暈去；伊就為家己求死， 講，我死比活khah好。

Iok-ná-su 《約拿書》 Jonah Tē sì chiuⁿ 第四章 Tē 9 chat 第九節 Siōng-tè tùi Iok-ná kóng, Lí in-ūi chit châng pi-moâ siū-khì ha̍p-lí mah? Ìn kóng, Goá siū-khì kàu-sí ia̍h ha̍p-lí. 上帝對約拿講， 你因為chit叢箄麻受氣 合理mah？應講， 我受氣到死亦合理。

Iok-ná-su 《約拿書》 Jonah Tē sì chiuⁿ 第四章 Tē 10 chat 第十節 Iâ-hô-hoa kóng, Chit châng pi-moâ, lí bô ūi i tio̍h-boâ, lí bô hō͘ i toā-châng, chi̍t-mî hoat-siⁿ, chi̍t-mî sí-khì, lí iáu-kú thiàⁿ-sioh; 耶和華講，Chit叢箄麻， 你無為伊tio̍h磨，你無hō͘伊大叢， 一暝發生，一暝死去， 你iáu-kú疼惜；

Iok-ná-su 《約拿書》 Jonah Tē sì chiuⁿ 第四章 Tē 11 chat 第十一節 hô-hòng Goá, Goá kiám-m̄-tio̍h thiàⁿ-sioh Nî-nî-bî, chit ê toā-siâⁿ mah? Kî-tiong boē-oē hun-piat chó-iū chhiú--ê, m̄-nā cha̍p-jī-bān, koh ū choē-choē cheng-siⁿ? 何況我，我kiám m̄-tio̍h 疼惜尼尼微，chit-ê大城mah？ 其中boē能分別左右手ê， m̄-nā十二萬，koh有choē-choē cheng-siⁿ？