Pa-khek-lé Siu-tèng-pán Sèng-keng 巴克禮修訂版聖經 Kū-iok “Chhòng-sè-kì” Tē cha̍p-chhit chiuⁿ 舊約 創世記 第十七章 Genesis

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 1 chat 第一節 A-pek-lân káu-cha̍p-káu hè ê sî, Iâ-hô-hoa tùi A-pek-lân hián-hiān, kā i kóng, Goá sī choân-lêng ê Siōng-tè, lí tī Goá ê bīn-chêng kiâⁿ-choè tio̍h oân-choân. 亞伯蘭九十九歲ê時， 耶和華對亞伯蘭顯現，kā伊講， 我是全能ê上帝，你tī我ê 面前行做tio̍h完全。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 2 chat 第二節 Goá beh kap lí li̍p Goá ê iok, hō͘ lí ê hō͘-è ke̍k-kî choē. 我beh kap你立我ê約， hō͘你ê後裔極其choē。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 3 chat 第三節 A-pek-lân chiū phak-lo̍h tī toē-ni̍h; Siōng-tè koh kap i kóng-oē, kóng, 亞伯蘭就仆落tī地裡； 上帝koh kap伊講話，講，

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 4 chat 第四節 Goá kap lí li̍p Goá ê iok, lí beh choè choē-choē kok ê pē. 我kap你立我ê約， 你beh做choē-choē國ê父。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 5 chat 第五節 Tùi taⁿ í-āu, lí ê miâ bô koh kiò-choè A-pek-lân, sī beh kiò-choè A-pek-la̍h-hán, in-ūi Goá í-keng li̍p lí choè choē-choē kok ê pē. Tùi taⁿ以後，你ê名無koh叫做亞伯蘭， 是beh叫做亞伯拉罕， 因為我已經立你做 choē-choē 國ê父。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 6 chat 第六節 Goá beh hō͘ lí ê hō͘-è ke̍k-kî choē, kok-tō͘ tùi lí lâi li̍p, kun-ông tùi lí lâi chhut. 我beh hō͘你ê後裔極其choē， 國度tùi你來立， 君王tùi你來出。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 7 chat 第七節 Goá beh kap lí, í-ki̍p lí le̍k-tāi ê hō͘-è, siat-li̍p Goá ê iok choè éng-oán ê iok; sī beh choè lí kap lí ê hō͘-è ê Siōng-tè. 我beh kap你，以及你歷代ê後裔， 設立我ê約做永遠ê約； 是beh做你kap你ê後裔ê上帝。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 8 chat 第八節 Goá beh chiong lí hiān-chāi chhut-goā ê toē, chiū-sī Ka-lâm choân-toē, siúⁿ-sù lí kap lí ê hō͘-è, choè éng-oán ê gia̍p; Goá ia̍h beh choè in ê Siōng-tè. 我beh將你現在出外 ê地，就是迦南全地， 賞賜你kap你ê後裔，做永遠ê業； 我亦beh做in ê上帝。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 9 chat 第九節 Siōng-tè koh tùi A-pek-la̍h-hán kóng, Lí kap lí ê hō͘-è tio̍h le̍k-tāi chun-siú Goá ê iok. 上帝koh對亞伯拉罕講， 你kap你ê後裔 tio̍h歷代遵守我ê約。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 10 chat 第十節 Lín tiong-kan só͘ ū ê ta-po͘-ê, lóng tio̍h siū kat-lé; che chiū-sī Goá kap lí í-ki̍p lí ê hō͘-è só͘ li̍p ê iok, sī lín só͘ tio̍h chun-siú-ê. Lín中間所有ê ta-po͘-ê， lóng tio̍h受割禮；這就是 我kap你以及你ê後裔所立ê約， 是lín所tio̍h遵守ê。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 11 chat 第十一節 Lín tio̍h koah lín iông-bu̍t ê phê; che sī beh choè Goá kap lín só͘ li̍p ê iok ê kì-hō. Lín tio̍h割lín陽物ê皮； 這是beh做我kap lín 所立ê約ê記號。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 12 chat 第十二節 Lín le̍k-tāi ê ta-po͘-ê, bô-lūn ke-lāi siⁿ-ê, á-sī lí ê hō͘-è í-goā, ēng gûn tùi goā-bīn lâng boé-ê, í-keng chhut-sì poeh-ji̍t, lóng tio̍h siū kat-lé. Lín歷代ê ta-po͘-ê，無論家內生ê， á是你ê後裔以外，用銀tùi 外面人買ê，已經出世八日， lóng tio̍h受割禮。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 13 chat 第十三節 Lí ke-lāi siⁿ-ê, kap lí ēng gûn boé-ê, lóng tek-khak tio̍h siū kat-lé; án-ni Goá ê iok beh hē tī lín ê sin-chiūⁿ, choè éng-oán ê iok. 你家內生ê，kap你用銀買ê， lóng的確tio̍h受割禮； án-ni我ê約beh hē tī lín ê身上， 做永遠ê約。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 14 chat 第十四節 Bô siū kat-lé ê ta-po͘-ê, i sin-khu kì-jiân bô siū kat-lé, sī poē Goá ê iok; tek-khak tùi peh-sìⁿ ê tiong-kan tû-khì. 無受割禮ê ta-po͘-ê， 伊身軀既然無受割禮， 是背我ê約； 的確tùi百姓ê中間除去。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 15 chat 第十五節 Siōng-tè koh tùi A-pek-la̍h-hán kóng, Lí ê bó͘ Sat-lāi, m̄-thang koh kiò i ê miâ Sat-lāi; i ê miâ beh kiò-choè Sat-la̍h. 上帝koh對亞伯拉罕講， 你ê bó͘撒萊，m̄-thang koh叫伊ê名 撒萊；伊ê名beh叫做撒拉。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 16 chat 第十六節 Goá beh sù-hok i, Goá ia̍h beh hō͘ lí tùi i tit-tio̍h chi̍t ê kiáⁿ; Goá beh sù-hok i, i ia̍h beh choè lia̍t-kok ê lāu-bú; beh ū pang-kok ê ông tùi i chhut. 我beh賜福伊，我亦beh hō͘你 tùi伊得tio̍h一個kiáⁿ；我beh賜福伊， 伊亦beh做列國ê老母； beh有邦國ê王 tùi伊出。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 17 chat 第十七節 A-pek-la̍h-hán chiū phak-teh chhiò, sim-lāi kóng, Chi̍t-pah hè ê lâng iáu oē siⁿ-kiáⁿ mah? Sat-la̍h í-keng káu-cha̍p hè, iáu oē seng-ióng mah? 亞伯拉罕就仆teh笑， 心內講，一百歲ê人 iáu能生kiáⁿ mah？撒拉已經 九十歲，iáu能生養mah？

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 18 chat 第十八節 A-pek-la̍h-hán tùi Siōng-tè kóng, Tān goān Í-si̍t-má-lī oa̍h tī Lí ê bīn-chêng. 亞伯拉罕對上帝講， 但願以實瑪利 活tī你ê面前。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 19 chat 第十九節 Siōng-tè kóng, M̄-sī lah, lí ê bó͘ Sat-la̍h beh kā lí siⁿ chi̍t ê kiáⁿ, lí beh kā i hō-miâ kiò Í-sat; Goá beh kap i siat-li̍p Goá ê iok, choè i ê hō͘-è éng-oán ê iok. 上帝講，m̄是lah， 你ê bó͘撒拉beh kā你生一個kiáⁿ， 你beh kā伊號名叫以撒； 我beh kap伊設立我ê約， 做伊ê後裔永遠ê約。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 20 chat 第二十節 Lūn-kàu Í-si̍t-má-lī, Goá ia̍h thiaⁿ lí kiû; lí khoàⁿ, Goá í-keng sù-hok i, beh hō͘ i heng-ōng, ke-thiⁿ ke̍k-kî choē. I beh siⁿ cha̍p-jī ê cho̍k-tiúⁿ, Goá ia̍h beh hō͘ i chiâⁿ-choè toā-kok. 論到以實瑪利，我亦聽你求； 你看，我已經賜福伊，beh hō͘伊興旺， 加添極其choē。伊beh生十二個族長， 我亦beh hō͘伊成做大國。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 21 chat 第二十一節 Kàu mê-nî chit-sî, Sat-la̍h beh kā lí siⁿ Í-sat; Goá beh kap i siat-li̍p Goá ê iok. 到明年 chit時， 撒拉beh kā你生以撒； 我beh kap伊設立我ê約。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 22 chat 第二十二節 Siōng-tè kap A-pek-la̍h-hán kóng soah, chiū lī-khui i chiūⁿ-khì. 上帝kap亞伯拉罕講soah， 就離開伊上去。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 23 chat 第二十三節 Tú-tú hit-ji̍t, A-pek-la̍h-hán chiàu Siōng-tè só͘ kā i kóng-ê, kā i ê kiáⁿ Í-si̍t-má-lī, kap A-pek-la̍h-hán ke-lāi it-chhè ê ta-po͘-lâng, bô-lūn tī ke-ni̍h siⁿ-ê, á-sī ēng i ê gûn boé-ê, lóng kiâⁿ kat-lé. Tú-tú hit日，亞伯拉罕照上帝 所kā伊講ê，kā伊ê kiáⁿ以實瑪利， kap亞伯拉罕家內一切ê ta-po͘人， 無論tī 家裡生ê，á是用伊ê銀買ê， lóng行割禮。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 24 chat 第二十四節 A-pek-la̍h-hán siū kat-lé ê sî káu-cha̍p-káu hè; 亞伯拉罕受割禮ê時 九十九歲；

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 25 chat 第二十五節 i ê kiáⁿ Í-si̍t-má-lī siū kat-lé ê sî cha̍p-saⁿ hè. 伊ê kiáⁿ以實瑪利 受割禮ê時十三歲。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 26 chat 第二十六節 Tú-tú hit ji̍t A-pek-la̍h-hán kap i ê kiáⁿ Í-si̍t-má-lī tâng siū kat-lé. Tú-tú hit日，亞伯拉罕 kap伊ê kiáⁿ以實瑪利 同受割禮。

“Chhòng-sè-kì”《創世記》Genesis Tē cha̍p-chhit chiuⁿ 第十七章 Tē 27 chat 第二十七節 Ke-lāi só͘-ū ê lâng, bô-lūn tī ke-ni̍h siⁿ-ê, á-sī ēng gûn tùi goā-bīn lâng boé-ê, lóng kap i tâng siū kat-lé. 家內所有ê人， 無論tī 家裡生ê， á是用銀tùi外面人買ê， lóng kap伊同受割禮。