Kū-iok Í-sài-a-su Tē 61 chiuⁿ Pa-khek-lé Siu-tèng-pán Sèng-keng 巴克禮修訂版聖經 Kū-iok Í-sài-a-su Tē 61 chiuⁿ 舊約 《以賽亞書》 第六十一章 Isaiah

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 1 chat 第一節 Chú Iâ-hô-hoa ê Sîn lîm-kàu goá; in-ūi Iâ-hô-hoa ēng iû boah goá, hō͘ goá thoân hok-im hō͘ sòng-hiong ê lâng; chhe goá i-hó siong-sim ê lâng, pò-kò siū-lia̍h-ê tit-tio̍h tháu-pàng, siū-koaiⁿ-ê chhut kaⁿ-lô; 主耶和華ê神臨到我； 因為耶和華用油抹我， hō͘我傳福音hō͘ sòng-hiong ê人； 差我醫好傷心ê人，報告受掠ê 得tio̍h tháu放，受關ê出監牢；

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 2 chat 第二節 pò-kò Iâ-hô-hoa hoaⁿ-hí ê nî, kap lán ê Siōng-tè pò-siû ê ji̍t; an-ùi it-chhè pi-ai ê lâng; 報告耶和華歡喜ê年， kap咱ê上帝報仇ê日； 安慰一切悲哀ê人；

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 3 chat 第三節 tī Sek-an pi-ai ê lâng ēng hoe-bō siúⁿ-sù i, lâi thoè hé-hu, hoaⁿ-hí ê iû lâi thoè pi-ai, o-ló ê saⁿ lâi thoè iu-chhiû ê sim, hō͘ in chheng-choè kong-gī ê chhiū, chiū-sī Iâ-hô-hoa só͘ chai--ê, lâi hián-bêng ka-kī ê êng-kng. tī錫安悲哀ê人用花帽賞賜伊， 來替火灰，歡喜ê油來替悲哀， o-ló ê衫來替憂愁ê心， hō͘ in稱做公義ê樹，就是 耶和華所栽ê，來顯明家己ê榮光。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 4 chat 第四節 In beh khí-chō kó͘-chá pha-hng ê só͘-chāi, kiàn-li̍p chá-chêng léng-chēng ê ūi-chhù, iā beh siu-lí pha-hng ê siâⁿ, chiū-sī tāi-tāi léng-chēng ê ūi-chhù. In beh起造古早拋荒ê所在， 建立早前冷靜ê位厝， 也beh修理拋荒ê城， 就是代代冷靜ê位處。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 5 chat 第五節 Goā-bīn lâng beh khí-lâi kò͘ lín ê iûⁿ-kûn, goā-pang lâng beh kā lín choh-chhân, chiàu-kò͘ lín ê phû-tô-hn̂g. 外面人beh起來顧lín ê羊群， 外邦人beh kā lín作田， 照顧lín ê葡萄園。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 6 chat 第六節 Chóng-sī lín beh chheng-choè Iâ-hô-hoa ê chè-si; lâng beh chheng lín choè lán ê Siōng-tè ê chhe-ēng; lín beh chia̍h-ēng lia̍t-kok ê châi-bu̍t, tit-tio̍h in ê êng-kng lâi khoa-kháu. 總是lín beh稱做耶和華ê祭司； 人beh稱lín做咱ê上帝ê差用； lín beh食用列國ê財物， 得tio̍h in ê榮光來誇口。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 7 chat 第七節 Lín beh tit-tio̍h ka-pē ê hok-khì lâi thoè só͘ siū ê kiàn-siàu; in beh hoaⁿ-hí tī in só͘ tit-tio̍h ê hūn-gia̍h, lâi thoè só͘ siū ê lêng-jio̍k; só͘-í tī kéng-lāi beh tit-tio̍h ka-pē ê sán-gia̍p, éng-oán ê khoài-lo̍k beh kui hō͘ in. Lín beh得tio̍h加倍ê福氣來替所受ê見笑； in beh歡喜tī in所得tio̍h ê份額， 來替所受ê凌辱； 所以tī境內beh得tio̍h加倍ê產業， 永遠ê快樂beh歸hō͘ in。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 8 chat 第八節 In-ūi Goá Iâ-hô-hoa ài kong-pêng, oàn-hūn put-gī ê chhiúⁿ-kiap; Goá beh chiàu sêng-si̍t pò-èng in, iā beh kap in li̍p éng-oán ê iok. 因為我耶和華愛公平， 怨恨不義ê搶劫； 我beh照誠實報應in， 也beh kap in立永遠ê約。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 9 chat 第九節 In ê hō͘-è beh tī lia̍t-kok-tiong hō͘ lâng bat i, in ê kiáⁿ-sun tī chèng peh-sìⁿ-tiong iā sī án-ni; kìⁿ-nā khoàⁿ-kìⁿ in--ê beh jīn in, sī Iâ-hô-hoa sù-hok ê hō͘-è. In ê後裔beh tī列國中hō͘人bat伊， in ê kiáⁿ孫tī眾百姓中也是án-ni； 見若看見in-ê beh認in， 是耶和華賜福ê後裔。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 10 chat 第十節 Goá in-ūi Iâ-hô-hoa toā-toā hoaⁿ-hí, goá ê sim-sîn in-ūi goá ê Siōng-tè chiū khoài-lo̍k; in-ūi I ēng chín-kiù choè saⁿ kā goá chhēng, ēng kong-gī choè phàu kā goá moa, chhin-chhiūⁿ sin-kiáⁿ-sài tì súi ê bō, koh chhin-chhiūⁿ sin-niû chng-thāⁿ pó-mi̍h. 我因為耶和華大大歡喜，我ê心神因為 我ê上帝就快樂；因為祂用拯救 做衫kā我穿，用公義做袍 kā我moa，親像新kiáⁿ婿戴súi ê帽， koh親像新娘裝飾寶物。

Í-sài-a-su 《以賽亞書》 Isaiah Tē la̍k-cha̍p-it chiuⁿ 第六十一章 Tē 11 chat 第十一節 In-ūi thó͘-toē cháiⁿ-iūⁿ hō͘ pah-hāng ê gō͘-kak puh-gê, hn̂g cháiⁿ-iūⁿ hō͘ só͘-chèng--ê hoat-siⁿ, Chú Iâ-hô-hoa iā beh án-ni hō͘ kong-gī kap o-ló hoat-siⁿ tī bān-kok ê bīn-chêng. 因為土地怎樣hō͘百項ê五穀 puh芽，園怎樣hō͘所種ê發生， 主耶和華也beh án-ni hō͘公義 kap o-ló發生tī萬國ê面前。