Pa-khek-lé Siu-tèng-pán Sèng-keng 巴克禮修訂版聖經 Kū-iok 舊約 《民數記》 第十二章 Bîn-sò͘-kì Tē 12 chiuⁿ Numbers

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 1 chat 第一節 Bí-lī-àm kap A-lûn hiâm Mô͘-se, ūi-tio̍h i só͘ chhōa Kó͘-si̍t ê cha-bó͘-kiáⁿ; in-ūi Mô͘-se bat chhōa Kó͘-si̍t lâng ê cha-bó͘-kiáⁿ chòe bó͘. Bí-lī-àm kap亞倫嫌摩西， 為tio̍h伊所chhōa Kó͘-si̍t ê cha-bó͘-kiáⁿ； 因為摩西bat chhōa Kó͘-si̍t人ê cha-bó͘-kiáⁿ做bó͘。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 2 chat 第二節 In kóng, Iâ-hô-hoa kiám toaⁿ-toaⁿ kap Mô͘-se kóng-ōe? Kiám iā bô kap goán kóng-ōe mah? Chit ê ōe Iâ-hô-hoa thiaⁿ-kìⁿ. In講：耶和華 kiám單單kap摩西講話？ Kiám也無kap阮講話mah？ Chit-ê話耶和華聽見。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 3 chat 第三節 Hit ê Mô͘-se chòe-lâng ke̍k-kî un-jiû, iâⁿ-kè sè-chiūⁿ ê chèng-lâng. Hit-ê摩西做人極其溫柔， 贏過世上ê眾人。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 4 chat 第四節 Iâ-hô-hoa hut-jiân tùi Mô͘-se A-lûn Bí-lī-àm, kóng, Lín saⁿ-lâng chhut-lâi kàu hōe-bō͘ chia; in saⁿ-lâng chiū chhut-lâi. 耶和華忽然對摩西、亞倫、Bí-lī-àm， 講：Lín三人出來到會幕chia； in三人就出來。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 5 chat 第五節 Iâ-hô-hoa tī hûn-thiāu-tiong kàng-lîm, khiā tī Pò͘-pîⁿ mn̂g-kháu, tiàu A-lûn kap Bí-lī-àm; in nn̄g lâng chiū chhut-lâi. 耶和華tī雲柱中降臨， khiā tī布棚門口， 召亞倫kap Bí-lī-àm； in兩人就出來。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 6 chat 第六節 I kóng, Tio̍h thiaⁿ Góa ê ōe; lín tiong-kan nā ū sian-ti, Góa Iâ-hô-hoa beh ēng īⁿ-siōng hō͘ in bat Goá, tī bîn-bāng-tiong kap in kóng-ōe. 伊講： Tio̍h聽我ê話；lín中間若有先知， 我耶和華beh用異象hō͘ in bat我， tī眠夢中kap in講話。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 7 chat 第七節 Góa ê lô͘-po̍k Mô͘-se m̄-sī án-ni; i chīn-tiong tī Góa ê choân-ke. 我ê奴僕摩西m̄是án-ni； 伊盡忠tī我ê全家。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 8 chat 第八節 Góa beh bīn tùi bīn kap i kóng-ōe, chiū-sī bêng-bêng kóng, bô ēng chhai-gú; koh i beh khòaⁿ-kìⁿ Iâ-hô-hoa ê hêng-iông; lín hiâm Góa ê lô͘-po̍k Mô͘-se, siáⁿ-sū bô kiaⁿ ah? 我beh面tùi面kap伊講話， 就是明明講：無用猜語； koh伊beh看見耶和華ê形容； lín嫌我ê奴僕摩西，啥事無驚ah？

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 9 chat 第九節 Iâ-hô-hoa siū-khì in, chiū khì. 耶和華受氣in， 就去。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 10 chat 第十節 Hûn tùi Pò͘-pîⁿ-téng soá-khui; khòaⁿ ah, Bí-lī-àm thái-ko chhin-chhiūⁿ seh. A-lûn khòaⁿ Bí-lī-àm, khòaⁿ ah, i sī thái-ko. 雲tùi布棚頂徙開； 看ah，Bí-lī-àm thái-ko親像雪。 亞倫看Bí-lī-àm，看ah，伊是thái-ko。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 11 chat 第十一節 A-lûn tùi Mô͘-se kóng, Góa ê chú ah, kiû lí bo̍h-tit in-ūi goán ê gû-gōng hoān-chōe, chiong chit ê chōe kui tī goán. 亞倫對摩西講：我ê主ah， 求你莫得因為阮ê愚戇犯罪， 將chit-ê罪歸tī阮。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 12 chat 第十二節 Kiû lí m̄-thang hō͘ i chhin-chhiūⁿ í-keng sí, chiah tùi lāu-bú ê thai chhut, bah í-keng nōa chi̍t-poàⁿ. 求你m̄-thang hō͘伊親像已經死， chiah tùi老母ê胎出， 肉已經爛一半。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 13 chat 第十三節 Mô͘-se chiū ai-kiû Iâ-hô-hoa kóng, Siōng-tè ah, kiû Lí i-hó i. 摩西就哀求耶和華講： 上帝ah， 求你醫好伊。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 14 chat 第十四節 Iâ-hô-hoa tùi Mô͘-se kóng, Siat-sú i ê lāu-pē phùi-nōa tī i ê bīn, i kiám bô kiàn-siàu chhit-ji̍t mah? Taⁿ tio̍h kā i koaiⁿ tī iâⁿ-gōa chhit-ji̍t, jiân-āu chiah thang chhōa i ji̍p-lâi. 耶和華對摩西講： 設使伊ê老父phùi涎tī伊ê面， 伊kiám無見笑七日mah？ Taⁿ tio̍h kā伊關tī營外七日， 然後chiah thang chhoā伊入來。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 15 chat 第十五節 Tùi án-ni, koaiⁿ Bí-lī-àm tī iâⁿ-gōa chhit-ji̍t; peh-sìⁿ bô khí-sin, thèng-hāu Bí-lī-àm koh ji̍p-lâi. Tùi án-ni，關Bí-lī-àm tī營外七日；百姓無起身， thèng候Bí-lī-àm koh入來。

Bîn-sò͘-kì 《民數記》 Numbers Tē cha̍p-jī chiuⁿ 第十二章 Tē 16 chat 第十六節 Āu-lâi peh-sìⁿ tùi Hap-sé-lio̍k khí-sin, tī Pa-lân ê khòng-iá an-iâⁿ. 後來 百姓tùi Hap-sé-lio̍k起身， tī Pa-lân ê曠野安營。