Kū-iok Ngá-ko Tē sì chiuⁿ Pa-khek-lé Siu-tèng-pán Sèng-keng 巴克禮修訂版聖經 Kū-iok Ngá-ko Tē sì chiuⁿ 舊約 《雅歌》 第四章 Song of Songs

Ngá-ko《雅歌》 Song of Songs Tē sì chiuⁿ 第四章 Tē 1 chat 第一節 Goá só͘-thiàⁿ-ê, khoàⁿ ah, lí chin-súi, khoàⁿ ah, lí chin súi, Tī phè ê lāi-bīn lí ê ba̍k-chiu chhin-chhiūⁿ kap; Lí ê thâu-mn̂g chhin-chhiūⁿ soaⁿ-iûⁿ kui-tīn; Tó tī Ki-lia̍t ê soaⁿ-piⁿ. 我所疼ê，看ah，你真súi， 看ah，你真súi，Tī phè ê內面你ê目睭 親像鴿；你ê頭毛親像 山羊kui陣；倒tī Ki-lia̍t ê山邊。

Ngá-ko《雅歌》 Song of Songs Tē sì chiuⁿ 第四章 Tē 2 chat 第二節 Lí ê chhùi-khí chhin-chhiūⁿ tú-á chián-mn̂g ê chi̍t-kûn iûⁿ, soé chheng-khì chiūⁿ--lâi, Ta̍k-chiah ū siang-siⁿ kiáⁿ, bô chi̍t-chiah sit-lo̍h i ê kiáⁿ. 你ê嘴齒親像 tú-á煎毛ê一群羊，洗清氣 上來，Ta̍k隻有雙生kiáⁿ， 無一隻失落伊ê kiáⁿ。

Ngá-ko《雅歌》 Song of Songs Tē sì chiuⁿ 第四章 Tē 3 chat 第三節 Lí ê chhùi-tûn chhin-chhiūⁿ chu-âng soàⁿ, Lí ê chhùi iā siⁿ-choè hó, Lí ê pìn-piⁿ tī phè-lāi, Chhin-chhiūⁿ chi̍t-tè sia̍h-liû. 你ê嘴唇親像朱紅線， 你ê嘴也生做好， 你ê鬢邊tī phè內， 親像一塊石榴。

Ngá-ko《雅歌》 Song of Songs Tē sì chiuⁿ 第四章 Tē 4 chat 第四節 Lí ê ām-kún chhin-chhiūⁿ Tāi-pi̍t ê tâi, khí choè kun-chông-ke̍k; Piah-téng tiàu chi̍t-chheng ê pîn-pâi, Lóng sī ióng-sū ê tîn-pâi. 你ê頷頸親像大衛ê台， 起做軍藏局； 壁頂吊一千個屏牌， lóng是勇士ê藤牌。

Ngá-ko《雅歌》 Song of Songs Tē sì chiuⁿ 第四章 Tē 5 chat 第五節 Lí ê nn̄g ê lin, chhin-chhiūⁿ chi̍t-tùi lo̍k-á, Chia̍h-chháu tī pek-ha̍p-hoe-tiong, Chiū-sī lo̍k-bú siang-siⁿ--ê. 你ê兩個奶， 親像一對鹿á， 食草tī百合花中， 就是鹿母雙生ê。

Ngá-ko《雅歌》 Song of Songs Tē sì chiuⁿ 第四章 Tē 6 chat 第六節 Kàu ji̍t liâng-léng, iáⁿ chhun-tn̂g ê sî, Goá beh khì bu̍t-io̍h soaⁿ, kap jú-hiuⁿ ê soaⁿ-thâu. 到日涼冷， 影伸長ê時， 我beh去沒藥山， kap乳香ê山頭。

Ngá-ko《雅歌》 Song of Songs Tē sì chiuⁿ 第四章 Tē 7 chat 第七節 Goá só͘-thiàⁿ-ê, lí oân-choân súi, Lí bô chi̍t-tiám-á hâ-chhû. 我所疼ê， 你完全súi， 你無一點á瑕疵。

Ngá-ko《雅歌》 Song of Songs Tē sì chiuⁿ 第四章 Tē 8 chat 第八節 Goá ê sin-niû, lí tio̍h tùi Lī-pa-lùn kap goá lâi, tùi Lī-pa-lùn kap goá lâi, Tùi A-má-ná ê téng-bīn, tùi Sī-nî-jíⁿ kap Hek-bûn ê téng-bīn; Tùi sai ê hia̍t, tùi pà ê soaⁿ khoàⁿ--lo̍h-khì. 我ê新娘，你tio̍h tùi黎巴嫩kap我來， tùi黎巴嫩kap我來，Tùi A-má-ná ê頂面， tùi Sī-nî-jíⁿ kap Hek-bûn ê頂面； tùi獅ê穴，tùi豹ê山看落去。

Ngá-ko《雅歌》 Song of Songs Tē sì chiuⁿ 第四章 Tē 9 chat 第九節 Goá ê sió-bē ah, goá ê sin-niû ah, Lí toa̍t goá ê sim, lí ēng ba̍k-chiu chi̍t-ē khoàⁿ, Ēng lí ê ām-kún ê chi̍t-tiâu kim-liān-á, toa̍t goá ê sim. 我ê小妹ah，我ê新娘ah， 你奪我ê心，你用目睭一下看， 用你ê頷頸ê一條金鍊á， 奪我ê心。

Ngá-ko《雅歌》 Song of Songs Tē sì chiuⁿ 第四章 Tē 01 chat 第十節 Goá ê sió-bē, goá ê sin-niû, lí ê ài-chêng cháiⁿ-iūⁿ hiah bí-biāu. Lí ê ài-chêng cháiⁿ-iūⁿ pí chiú khah-hó; Lí ê ko-iû ê phang-bī cháiⁿ-iūⁿ pí it-chhè ê hiuⁿ-liāu khah-iâⁿ. 我ê小妹，我ê新娘，你ê愛情 怎樣hiah美妙。你ê愛情 怎樣比酒khah好；你ê膏油ê芳味 怎樣比一切ê香料khah贏。

Ngá-ko《雅歌》 Song of Songs Tē sì chiuⁿ 第四章 Tē 11 chat 第十一節 Goá ê sin-niû ah, lí ê chhùi-tûn chhin-chhiūⁿ bi̍t-pô͘ teh tih, Lí ê chi̍h-ē ū bi̍t ū ni; Lí ê i-ho̍k ê phang-bī chhin-chhiūⁿ Lī-pa-lùn ê phang-bī. 我ê新娘ah， 你ê嘴唇親像蜜房teh滴， 你ê舌下有蜜有奶；你ê衣服ê芳味 親像黎巴嫩ê芳味。

Ngá-ko《雅歌》 Song of Songs Tē sì chiuⁿ 第四章 Tē 12 chat 第十二節 Goá ê sió-bē, goá ê sin-niû, chiū-sī koaiⁿ-só ê hn̂g; Khàm-ba̍t ê chíⁿ, hong-ba̍t ê chúi-choâⁿ. 我ê小妹，我ê新娘， 就是關鎖ê園； 蓋密ê井， 封密ê水泉。

Ngá-ko《雅歌》 Song of Songs Tē sì chiuⁿ 第四章 Tē 13 chat 第十三節 Lí só͘ chhut sī sia̍h-liû ê hn̂g, ū siōng-hó ê ké-chí, Chńg-kah-hoe kap ná-ta̍t ê chhiū. 你所出是石榴ê園， 有siōng好ê果子， 指甲花kap ná-ta̍t ê樹。

Ngá-ko《雅歌》 Song of Songs Tē sì chiuⁿ 第四章 Tē 14 chat 第十四節 Ū ná-ta̍t kap hoan-âng-hoe, Chhiong-pô͘ kap jio̍k-kùi, í-ki̍p chiah ê jú-hiuⁿ, Bu̍t-io̍h, tîm-hiuⁿ, kap it-chhè siōng-téng ê hiuⁿ-liāu. 有ná-ta̍t kap番紅花， 菖蒲kap肉桂， 以及chiah-ê乳香、沒藥、沉香， kap一切上等ê香料。

Ngá-ko《雅歌》 Song of Songs Tē sì chiuⁿ 第四章 Tē 15 chat 第十五節 Lí sī hn̂g-tiong ê chúi-choâⁿ, oa̍h-chúi ê chíⁿ, Tùi Lī-pa-lùn lâu--lo̍h-lâi ê khoe-chúi. 你是園中ê水泉， 活水ê井， Tùi黎巴嫩流落來ê溪水。

Ngá-ko《雅歌》 Song of Songs Tē sì chiuⁿ 第四章 Tē 16 chat 第十六節 Pak-hong ah, tio̍h khí-lâi, lâm-hong ah, tio̍h lâi, Chhe-lâi goá ê hn̂g, hō͘ i ê phang-bī hoat-chhut; Goān goá só͘ loân-ài-ê ji̍p i ê hn̂g-lāi, Chia̍h i hó ê ké-chí. 北風ah，tio̍h起來，南風ah，tio̍h來， 吹來我ê園，hō͘伊ê芳味發出； 願我所戀愛ê入伊ê園內， 食伊好ê果子。