Pa-khek-lé Siu-tèng-pán Sèng-keng 巴克禮修訂版聖經 Kū-iok “Chhòng-sè-kì” Tē cha̍p-poeh chiuⁿ 舊約 創世記 第十八章 Genesis

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 1 chat 第一節 Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî ji̍t tng joa̍h; A-pek-la̍h-hán chē tī pò͘-pîⁿ mn̂g-kháu; 耶和華tī Bān-lī ê橡樹hia， 對亞伯拉罕出現； hit時日當熱；亞伯拉罕 坐tī布棚門口；

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 2 chat 第二節 kia̍h-ba̍k khí-lâi khoàⁿ, khoàⁿ-kìⁿ saⁿ lâng tī tùi-bīn teh khiā; i chi̍t-ē khoàⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in, kia̍h目起來看， 看見三人tī對面teh khiā； 伊一下看見，就tùi布棚門口， 走去迎接in，

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 3 chat 第三節 phak tī toē-ni̍h, kóng, goá ê Chú, goá nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k choè lí khì; 仆tī地裡，講，我ê主， 我若tī你ê面前得tio̍h恩典， 求你m̄-thang離開奴僕做你去；

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 4 chat 第四節 iông-ún the̍h tām-po̍h chúi, hō͘ lín soé-kha; chhiáⁿ hioh-khùn tī chhiū-kha; 容允the̍h淡薄水， hō͘ lín洗腳； 請歇睏tī樹腳；

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 5 chat 第五節 goá koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê oē khì kiâⁿ. 我koh the̍h淡薄餅，hō͘ lín點心； 然後進前去；因為lín是為tio̍h án-ni， chiah到lín ê奴僕chia。 In講，Thang照你ê話去行。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 6 chat 第六節 A-pek-la̍h-hán koáⁿ-kín ji̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, noá choè piáⁿ. 亞伯拉罕趕緊入布棚， 見撒拉講， 你緊緊用Saⁿ-sè-a ê麵粉， noá做餅。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 7 chat 第七節 A-pek-la̍h-hán koh cháu kàu gû-kûn ê só͘-chāi, khan chi̍t chiah chíⁿ koh hó ê gû-á lâi; kau hō͘ lô͘-po̍k, i chiū koáⁿ-kín khì pī-pān. 亞伯拉罕koh走到 牛群ê所在， 牽一隻chíⁿ koh好ê牛á來； 交hō͘奴僕，伊就趕緊去備辦。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 8 chat 第八節 A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h. 亞伯拉罕koh the̍h奶油kap 奶， kap所備辦ê牛á來， 排tī in ê面前；家己tī樹腳 khiā tī in ê身邊；in就食。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 9 chat 第九節 In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi. In kā伊講，你ê bó͘ 撒拉tī tah-lo̍h？ 伊講，Tī布棚內。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 10 chat 第十節 In tiong-kan chi̍t-ê kóng, Kàu-kî Goá tek-khak beh koh lâi lí chia; lí ê bó͘ Sat-la̍h beh siⁿ chi̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ. In中間一個講， 到期我的確beh koh來你chia； 你ê bó͘撒拉beh生一個kiáⁿ。 撒拉tī後面，布棚門口，teh聽。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 11 chat 第十一節 A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng choa̍t. 亞伯拉罕kap撒拉 年歲已經老； 撒拉ê月經已經絕。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 12 chat 第十二節 Sat-la̍h sim-lāi chhiò kóng, Goá í-keng soe-lám, goá ê chú ia̍h lāu-lah; kiám iáu ū chit-hō ê hoaⁿ-hí? 撒拉心內笑講， 我已經衰lám， 我ê主亦老lah； kiám iáu有chit號ê歡喜？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 13 chat 第十三節 Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Goá í-keng lāu, kó-chin oē siⁿ-kiáⁿ mah? 耶和華對亞伯拉罕講， 撒拉為啥事笑，講， 我已經老，果真能生kiáⁿ mah？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 14 chat 第十四節 Kiám Iâ-hô-hoa ū choè-boē-lâi ê sū mah? Kàu-kî, mê-nî chit-sî, Goá beh koh lâi lí chia, Sat-la̍h beh siⁿ chi̍t ê kiáⁿ. Kiám耶和華有做boē來ê事mah？ 到期，明年 chit時， 我beh koh來你chia， 撒拉beh生一個kiáⁿ。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 15 chat 第十五節 Sat-la̍h kiaⁿ, m̄-jīn, kóng, Goá bô chhiò. Hit-lâng kóng, Bô-iáⁿ; lí si̍t-chāi ū chhiò. 撒拉驚，m̄認，講， 我無笑。hit人講， 無影；你實在有笑。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 16 chat 第十六節 Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chi̍t-chām. Hiah-ê人就tùi hia起來， ǹg所多瑪去；亞伯拉罕 也kap in相kap行， beh送in一站。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 17 chat 第十七節 Iâ-hô-hoa kóng, Goá só͘ beh choè ê sū, kiám thang tùi A-pek-la̍h-hán ún-khǹg mah? 耶和華講，我所beh做ê事， kiám thang tùi亞伯拉罕 隱khǹg mah？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 18 chat 第十八節 In-ūi A-pek-la̍h-hán tek-khak beh chiâⁿ-choè kiông-toā ê kok, toē-chiūⁿ bān-kok beh in-ūi i lâi tit-tio̍h hok-khì. 因為亞伯拉罕的確 beh成做強大ê國， 地上萬國beh因為伊 來得tio̍h福氣。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 19 chat 第十九節 Goá bat i, sī beh hō͘ i bēng-lēng i ê kiáⁿ kap i ê ke-koàn; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê oē, lóng kui hō͘ i. 我bat伊，是beh hō͘伊命令伊ê kiáⁿ kap 伊ê家眷；hō͘ in長長守耶和華ê道理， 秉公行義；致到耶和華 指亞伯拉罕所講ê話，lóng歸hō͘ 伊。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 20 chat 第二十節 Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-toā, in ê choē-ok si̍t-chāi tāng. 耶和華講，所多瑪、 蛾摩拉hoah-hiàm ê聲真大， in ê罪惡實在重。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 21 chat 第二十一節 Goá taⁿ beh lo̍h-khì, khoàⁿ in só͘ kiâⁿ-ê, kó-jiân it-chīn chiàu Goá só͘ thiaⁿ ê siaⁿ á bô; nā bô án-ni, Goá ia̍h oē chai. 我taⁿ beh落去，看in所行ê， 果然一盡照我所聽ê聲á無； 若無án-ni，我亦會知。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 22 chat 第二十二節 Hiah ê lâng tùi-hia oa̍t-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng. Hiah-ê人tùi-hia oa̍t-tńg身， ǹg所多瑪去；亞伯拉罕 iáu khiā tī耶和華ê面前。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 23 chat 第二十三節 A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah? 亞伯拉罕近前來講， 好人kap pháiⁿ人， 你lóng beh剿滅mah？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 24 chat 第二十四節 Siat-sú siâⁿ-lāi ū gō͘-cha̍p ê hó-lâng, Lí iû-goân beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah? 設使城內有五十個好人， 你猶原beh剿滅hit所在mah？ 無beh為tio̍h城內chí五十個 好人，來赦免in mah？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 25 chat 第二十五節 Goān Lí koat-toàn bô án-ni kiâⁿ, chiong hó-lâng kap pháiⁿ-lâng choè-chi̍t-ē hāi-sí; tì-kàu hó-lâng kap pháiⁿ-lâng saⁿ-tâng; goān Lí koat-toàn bô án-ni kiâⁿ; sím-phoàⁿ choân-toē ê Chú kiám bô kiâⁿ kong-gī mah? 願你決斷無án-ni行， 將好人kap pháiⁿ人做一下害死； 致到好人kap pháiⁿ人相同； 願你決斷無án-ni行；審判 全地ê主kiám無行公義mah？

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 26 chat 第二十六節 Iâ-hô-hoa kóng, Goá nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Goá chiū ūi-tio̍h in ê iân-kò͘ khoan-iông hit só͘-chāi. 耶和華講，我若tī所多瑪 城內tú-tio̍h有五十個好人， 我就為tio̍h in ê緣故 寬容hit所在。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 27 chat 第二十七節 A-pek-la̍h-hán ìn kóng, Goá sui-jiân sī hé-hu thô͘-hún, iáu-kú káⁿ tùi Chú kóng-oē; 亞伯拉罕應講， 我雖然是火灰土粉， iáu-kú敢對主講話；

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 28 chat 第二十八節 siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê,châu-bia̍t choân-siâⁿ mah? I kóng, Goá tī-chia nā tú-tio̍h ū sì-cha̍p-gō͘ ê, ia̍h bô beh châu-bia̍t. 設使chiah-ê五十個好人欠五個； 你就因為欠五個，剿滅全城mah？ 伊講，我tī-chia若tú-tio̍h有四十五個， 亦無beh剿滅。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 29 chat 第二十九節 A-pek-la̍h-hán koh tùi I kóng, Siat-sú tī-chia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Goá ia̍h bô beh choè chit ê sū. 亞伯拉罕koh對伊講， 設使tī-chia tú-tio̍h四十個nih？ 伊講，為tio̍h chiah-ê四十個 ê緣故， 我亦無beh做chit-ê事。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 30 chat 第三十節 I koh kóng, Kiû Chú bo̍h-tit siū-khì, goá beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Goá tī-chia nā tú-tio̍h ū saⁿ-cha̍p-ê, Goá ia̍h bô beh choè chit ê sū. 伊koh講，求主莫得受氣， 我beh koh講；設使tī-hia若tú-tio̍h 三十個nih？祂講，我tī-chia若tú-tio̍h 有三十個，我亦無beh做chit-ê事。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 31 chat 第三十一節 I kóng, Goá iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Goá ia̍h bô beh châu-bia̍t. 伊講，我iáu-kú敢對主講； 設使tī-hia tú-tio̍h有二十個nih？ 祂講，為tio̍h chiah-ê二十個 ê緣故， 我亦無beh剿滅。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 32 chat 第三十二節 I kóng, Kiû Chú bo̍h-tit siū-khì, goá koh kóng chit chi̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Goá ia̍h bô beh châu-bia̍t. 伊講，求主莫得受氣，我koh講 chit一pái；設使tī-hia tú-tio̍h有十個nih？ 祂講，為tio̍h chiah-ê十個ê緣故， 我亦無beh剿滅。

“Chhòng-sè-kì”《創世記》Genesis Tē cha̍p-poeh chiuⁿ 第十八章 Tē 33 chat 第三十三節 Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi. 耶和華kap亞伯拉罕 講明白，就上去。 亞伯拉罕亦tò去伊ê所在。